Tödö Niha Miserai ba Tödö Nono Niha

Darua pasitoro ono niha si möi wamaigi British Museum.
Oroma furira yaŵa mbawa ndruhö mbalö moroi ba göba gosali
moroi ba ginötö Gaberahamo.
Tola taŵa'ö no irai itörö-törö tou gaba-gaba andrö tuada Aberahamo
ero möi ia bakha ba gosali wanuno Lowalangi
(London, 15 Aug 2015. Arsip pribadi)

Mendröfi 2010 so sambua wama'oli (exhibition ba li Inggris) nifalua British Museum, sambua nahia wangowuloi gama-gama satua (museum ba li Indonesia) ba London. Töi wama'oli andrö "Sura Niha Simate" (Book of the dead. Journey through the afterlife. Ancient Egyptian Book of the Dead).[1]

Ba wama'oli andrö laforoma'ö sambua mbuku sanau sibai sanandrösa ba lala nitörö niha Miserai moroi ba ginötö wa'amate irugi wa'auri si lö aetu. Sindruhunia tenga sambua buku, ba hiza sambua gölu-gölu garate papirus sanau sibai (37 mete wa'anau). Bakha ba mbuku andrö tesura zi lö tola lö'ö tetöngöni sagötö wofanö ba lala ba fangandrö (mantra ba li Indonesia) si lö tola lö'ö muŵa'ö ena'ö tola tetimbagö khö zi mate andrö fefu zalakha, tola itörö wanguhuku safuria ba tola irugi wa'auri si lö aetu.[2]

Sadöni dödöda moroi ba wama'oli andrö ba no lala hewisa wamaigi ndra niha Miserai wa'auri aefa wa'amate. Ba gotalua wa'aurida ba gulidanö andre ba fa'auri ba zorugo so lala sanau sibai sanörö "nahia zimate" safönu fama'ala.[3]

Hulö no fakhili-khili lala wamaigi andre ba tradisi niha Keriso sanandrösa ba galitö fangehao nifotöi api pencucian ba li Indonesia (purgatory ba li Inggris). Molo'ö famati niha Keriso me mate Yesu möi ia ba mbanua niha tou fatua lö maoso Ia.[4] Latörö göi nahia mbanua niha tou andrö ira niha Keriso na mate ira, andrö wa mangandrö niha samati ena'ö tola aefa ira moroi ba galitö fangehao ma banua niha tou andre.[5]

Ba hiza sabölö adöni dödö Nono Niha ba wama'oli andrö ba lala wama'anö mboto zimate (mummification ba li Inggris). Hulö so zi fagölö lala wamaigi niha Miserai ba Ono Niha duho wa'auri. Tenga si mane ba li Indonesia laŵaö saya ber-pikir ba Li Niha lamane ba dödögu. No fakhili-khili ba lala wamaigi niha Miserai.

Ba wama'anö mboto zimate, laheta ba latibo'ö fefu nösi mboto sedöna obou niha Miserai: ösi dalu ba tanö bö'önia bakha ba da'ö, si manö göi guto. Ha tödö niröira (diawetkan ba li Indonesia). Hulö na laŵa'ö, tenga uto duho wa'auri ba hiza tödö. He so gutonia, lö tola "auri" ba "mofanö" niha simate wanörö mbanua niha tou na lö tödönia!

Si manö göi ba Danö Niha. "Ba dödögu" laŵa'ö Ono Niha na mangera-ngera ira, eluahania la'oguna'ö gutora (ba li Indonesia: Menurut pertimbangan saya). "Hewisa ba dödöu" laŵa'ö na la'andrö mbua wangera-ngera niha bö'ö (ba li Indonesia: Bagaimana menurut pendapatmu?).[6]

Eluahania tödö no salahi niha ma'afefu. Tödö tenga ha salahi gera'era, ba hiza salahi fefu zi fakhai ba khögu: era'eragu, haratogu, amuatagu, bualagu ba tanö bö'önia na. Aefa mohalöŵö ira lamane Ono Niha erege dödögu, ba hiza tödö ba da'e no salahi mboto ba noso ma'afefu. Abu dödögu laŵa'ö na sa, hulö na ha tödöra zoraoi. Ba hiza si manö göi ba da'a boto ba noso ma'afefu zabu tödö.

Börö da'ö so manö-manö ba Danö Niha nifotöi Tödö Hia. Tuada Hia no mate, lö auri ia sa'ae. Ba hiza molo'ö manö-manö andrö auri na sa Duada Hia ba gotaluada ba dödönia si so bakha ba mboto-boto. Lö aetu mangera-ngera dödönia andrö ba ibe'e mene-mene awö degu-degu khöda.[7]

Si manö göi ba hada (tradisi) niha Keriso. So nifotöi devosi Hati Kudus Yesus.[8] Heŵa'ae no manahae Keriso ba zorugo, lö aetu tobali ia awöda ba lala wa'aurida si ero ma'ökhö börö me so dödö-Nia si fao khöda bakha ba Gereja-Nia same'e mene-mene ba degu-degu khöda.

Lö na sa niha sangi'ila (ahli ba li Indonesia) sanguma'ö wa so khai-khai lala wamaigi (konsep) Niha Miserai ba lala wamaigi Nono Niha sanandrösa ba dödö. Ba hiza ha niha sowaö-waö faoma tödönia to la musindro faoma högö yaŵa ba ahe tou, tenga tobali. Börö me ha tödö zi so ba gotalua, si tobali tuho fefu mboto ba noso.

Gohe-gohe

1. https://blog.britishmuseum.org/what-is-a-book-of-the-dead/

2. http://niasonline.net/2010/12/16/todo-orang-mesir-kuno-dan-orang-nias-sdnmt-3/

3. http://niasonline.net/2010/12/16/todo-orang-mesir-kuno-dan-orang-nias-sdnmt-3/

4. https://id.wikipedia.org/wiki/Pengakuan_Iman_Rasuli

5. https://id.wikipedia.org/wiki/Purgatorium

6. http://niasonline.net/2010/12/16/todo-orang-mesir-kuno-dan-orang-nias-sdnmt-3/

7. http://niasonline.net/2008/05/08/todo-hia-walangi-adu/

8. https://id.wikipedia.org/wiki/Hati_Kudus_Yesus

Note:

This article first appeared on Wikipedia Nias which wa still in incubator stage. However I stopped writing there because of aggressive behaviour of one of its editors, who forced the article to be written in an other more known Nias dialect.