Balö huhuo ba we'amöi tome

Lö fino lö afo. So wino, so nafoda.
Dinesh Valke from Thane, India / CC BY-SA

Databua’ö ho’ae, tafalalini,

Databua’ö ho’ae, tafagilo,

Ya’ita tome wotalinga mbatö,

Ya'ita tome wotalu zalo.

Datafazawili hörö zombö,

Datafasalio hirohiro.

Datafaedo gayagaya waha,

Datafaedo mbisi sesolo;

Yomo ba nomo zalaŵa helanö,

Yomo ba nomo Duha terongo.

Owua khöda dödö, ma'igi'igi,

Owua khöda dödö, omuso,

Me no tatema mbua lahina,

Me no tatema mbua nafo;

Mbuala danga masimasi,

Mbuala danga idoro

Khö ninada Tuho barasi,

Khö ninada Tuho nomo.

Ho ifidi isakai lahina,

Ho ifidi, isakai nafo,

Barö zangehowu öri,

Barö helatö sinundro,

Wa ikholi wino, ifosöri,

Wa ikhoi dawuo, ifobeto;

Ho ilau gurakhi ba zi föfö,

No ilau gafoa, hunö wino;

Hulö nilömbu ahe gelagela,

Hulö nilömbu ahe ngaroto.

Ba he wöi, me no langanga mbua lahina,

Ba he wöi, me no langanga mbua nafo,

Andrö wa sara waŵa lö damanga,

Andro döfi fasui lö olofo.

A'oi esolo ndraono side'ide,

A'oi esolo ndraono safuo,

A'oi abölö zi tebai mofanö,

A'oi abölö zi tebai milo.

Me no tanganga mbua lahina,

Me no tanganga mbua nafo,

Ösi mbolara ni’otaraŵa,

Ösi mbola ni'ohulajo :

Ösi nuwu zaranö ana’a,

Ösi nuwu zaranö hamo;

Ya'ia dawuo lasaramboi alitö,

Ya'ia dawuo lasaramboi simbo :

Ya'ia sa wino so'uli gana'a,

Ya'ia sa wino so'uli hamo.

Ya'ia mbago mömö sire ana'a,

Ya'ia mbago mömö sire hamo.

Gohe-gohe:

No muhalö mbalö huhuo andre moroi ba nifotöi "Gema" bakha ba "Umanö ba we'amöi tome" (28 nga'örö zura wa'anau!) nifa'oli H. Sundermann, Niassische Texte mit deutscher Übersetzung, 1905, hlm. 1. No göi mubulö'ö gila'ila zure molo'ö EYD ba Li Ndrawa ena'ö aoha wombaso ba niha bö'ö.